نړيوال قانون په غرب او اسلام کې

د نړيوال قانون په اړه یو ارزښتناک او نوښتګر اثر، د “نړيوال قانون؛ په غرب او اسلام کې” تر سرلیک لاندې، د زاهد جلالي له خوا لیکل شوی کتاب دی.
په دې اثر کې د غرب اوسنی واکمن قانون او نظم او هم د اسلامي پېر قانون څېړي او ارزوي. کتاب په ټوله کې پر دوو برخو وېشل شوی دی:
لومړۍ برخه د معاصر نړيوال قانون تعریف، سرچینې، تاریخچه او بنسټیز مفاهیم تشریح کوي. دا برخه د “غربي نړيوال قانون” تر عنوان لاندې د هغو مفاهیمو انتقادي شننه وړاندې کوي چې د غربي تمدن تر چتر لاندې رامنځته شوي دي.
دویمه برخه د اسلامي نړيوال قانون اړوند بحث کوي، چې له سره موخه یې دا ده چې لوستونکي ته دا پیغام ورسوي: اسلامي تمدن هم خپل ځانګړی قانوني سیسټم لري چې باید وپېژندل شي او ورباندې کار وشي.
د لیکوال په وینا:
“دا کتاب هڅه کوي د نړيوال قانون مفاهیم په ساده او روانه ژبه وړاندې کړي، څو یوازې حقوقي محصلین نه، بلکې هر لوستونکی چې له قانون، سیاست او نړیوال نظم سره علاقه لري، استفاده ترې وکړای شي.
دا اثر د علمي بحثونو او فکري هڅو لپاره یو مهم پیل بلل کېږي، او تمه ده چې استادان او څېړونکي یې د لا ژورې مطالعې او پراختیا لپاره وکاروي.

د افغانستان پنځه زره کلن تاریخ هېنداره
د افغانستان پنځه زره کلن تاریخ هېنداره کتاب د نني افغانستان په اړه چې د نړۍ د لرغونو مدنیتونو څخه دی، د دې جغرافیې د سیاسي، کلتوري او ټولنیزو بدلونونو په اړه یوه هر اړخیزه تاریخي کتنه وړاندې کوي.
یاد کتاب ښاغلي استاد اغا محمد غیرت دراني په ۱۱۶ مخونو کې لیکلی دی.
په دې کتاب کې د بېلابېلو امپراتوریو، جګړو، او سولې د دورو د بیان ترڅنګ، د دې هېواد د ستراتیژیک موقعیت او د نړۍ د زبر ځواکونو په سیالیو کې د هغه رول ته ژوره کتنه شوې ده.
لیکوال د کتاب په سریزه کې زیاتوي چې د دې لنډ تاریخ له لیکلو یې موخه دا ده چې افغانان خپل هویت او لرغونی تمدن وپېژني څو ځوانان او هم افغانستان پېژندونکي د یوه خلص او جامع سرچینې په توګه ترې استفاده وکړی شي او هم د ژورې او پراخې مطالعې فکر او لاره یې ومومي.
د یادونې وړ ده چې د دې اثر ترمخه ښاغلي اغا محمد غیرت دراني د افغانستان د پنځه زره کلن تاریخ او هم اسلامي امپراتورۍ‍ او د افغانستان د پوهنیز بهیر په اړه څو ډوله نقشې جوړې کړې دي چې د ښوونیزو او اکاډمیکو بنسټونو له تاوده هرکلي سره مخ شوې او په لوړ تیراژ خپرې شوې هم دي.